Marknadssjef Randi Bråtveit har merka seg at unge velståande kinesarar kjem på ei form for dannelsesreise, der dei for fyrste gong reiser utan familien sin. Auken i turiststraumen frå Kina har ikkje gått upåakta hen og i januar i år gjekk eigarskapet av hotellet over i nye hender. Fyrste januar i år vart hotellet kjøpt opp av kinesiske eigarar. Marknadssjefen er spent og seier dei nye eigarane har store planar for hotellet og området rundt, men at dei konkrete planane ikkje er komne på bordet.
Trass i denne positive veksten av turistar har Bråtveit eit høgt ønske om å få fleire av dei lokale på Jørpeland til å ta turen innom og oppdaga kva dei har å tilby.
– Det er mange som har oppdaga at me har gode lokale for selskap, fortel ho. Me har lokale som kan delast av til mindre og meir intime lokale avhengig av kor mange ein er.
I tillegg til selskapslokale har hotellet open kafé kvar dag, slik at det går an å stikke innom for lunsj og middag for alle som ønskjer å få ei avveksling frå eige kjøken.
– Me har alle rettar og serverer alt frå á la carte til komlemiddag ein dag i veka, ivrar ho. Ho vil gjerne at dei lokale på Jørpeland skal sjå på hotellet og serveringsstaden som ein naturleg møteplass der dei kan ta turen saman familie og vener.
Gunnhild Hellvik (26) er ein av tre kokkar som er engasjerte på hotellet og sørger for dei gode matopplevingane. Ho har åtte år som kokk på Sola Strandhotell bak seg og har sidan september i fjor jobba deltid på Jørpeland. I dag deler ho på kjøkenansvaret saman med to andre kokkar, og i alt er dei sju personar som jobbar på hotellet.
Hellvik er i full sving på kjøkenet når Mitt Ryfylke kjem innom. Ho har entrecote, servert på selleripuré med bakte rotgrønsaker på menyen i dag. Det både ser godt ut og smakar godt.
Bråtveit fortel at kjøkenet deira er kjent for deira eigen Steel Burger, gode fiskesuppe og fiskerettane dei serverer. Dei har og tradisjonsmat som kjøttkaker kvar onsdag i tillegg til komlemiddagen torsdagen.
God kronekurs for turistar i Noreg gir ringverknadar for reiselivsbransjen, og for hotellet på Jørpeland har veksten i besøkande frå Asia, då i hovudsak Kina, tripla seg frå 50 netter i 2014 til 165 i 2015, men framleis er det Nordmenn som soleklart toppar besøksstatistikken. Elles er det bra besøk av europearar, der tyskarar og nederlendarar står for ein god del av gjestedøgera.
Mykje av besøket skuldast nok at Verkshotellet ligg gunstig til for ein dagstur til Preikestolen, og er berre ei lita reis frå Stavanger. Hotellet hadde i 2015 det beste året sidan nyopninga i 2011. I feriesesongane er det turistar som dominerer gjestedøgera. Men året rundt er hotellet og overnattingsstad for arbeidsfolk som jobbar for næringslivet i regionen, deriblant arbeidarar som jobbar i samband med utbygginga av Ryfast. Dette er ikkje noko nytt for det tradisjonsrike hotellet.
Då hotellet vart bygd av Stavanger Electro Staalverk i 1914, var det i hovudsak for å husa tilflyttande funksjonærar og fagfolk som skulle jobba og trengde ein stad å bu.
Hotellet er teikna av arkitekt Arnstein Arneberg, som står bak teikningane av både kongsgarden Skaugum og Oslo Rådhus. Sidan dess har bygget både blitt utvida og fått vernestatus.
Etter mange år utan både drift og vedlikehald tok Sigbjørn og Synnøve Vadla, som og eig og driv Høiland Gard i Årdal, over eigarskapet og opna i august i 2011 hotellet etter ei totalrenovering. Dei har fått hotellet opp å gå, men har dei siste åra vore på utkikk etter nokon som kan ta det vidare. I dag har turistane fått augene opp for det flotte hotellet, som har utsikt frå både fyrste og andre etasje rett ut på fjorden. Dei lyse og lette lokala og dei nyoppussa romma er delikate og innbydande, og utsikten rett ut fjorden er heller ikkje å forakta verken sommar- eller vinterstid både for turistar og lokalbefolkning.
Karamellpudding
- 2dl sukker til karamell
- 7dl mjølk
- 1dl fløyte
- 1-2 vaniljestang
- 4ss sukker
- 5 store egg
Lag karamell, fyll i ønska form (2l)
Kok mjølk og fløyte opp med sukkeret, vaniljestanga og frøa (del i to og skrap ut frøa)
Kjøl av til den er lunka.
Pisk egga godt saman med ein visp og sil de over den lunkne mjølka. Pisk godt.
Hell over forma med karamell
Forvarm ovnen til 120 grader, steik i vassbad i omlag 1,5 time
Sett formene kaldt eit døger
Server med piska krem og eit smil :)
— Gunnhild. ■
